Guddoomiyaha maamulka gobolka Hiiraan Cali Jeyte Cismaan ayaa nasiib daro weyn ku tilmaamay in Xildhibaan ka tirsan Baarlamaanka Fedaraalka Soomaaliya uu dhaliilo u jeediyo shacab Soomaaliyeed oo u istaagay la dagaalanka Al-shabaab.

Guddoomiye Jeyte ayaa Guddoonka Golaha Shacabka Soomaaliya ugu baaqay in si hoose ay u eegeen hadalka kasoo yeeray ee Xildhibaan Cabdirisaaq Xusul, islamarkaana baaris sharciyadeed lagu sameeyo Xildhibaanka eedeynta u jeediyay ciidanka dib u xoreynta deegaanka ee loo yaqano macawiisleeyda.

“Nin waxaan arkay wuxuu ka hadlay iyo wuxuu ku hadlay mid an garaneyn oo la yira hebalka Xusul oo ah argagixiso Al-shabaab ah, kana mid ah Baarlamaanka Soomaaliya oo dhaliiyaya ciidanka Macawiisleey oo u hiilinaya Al-shabaab, taasina waa nasiib daro weyn in Xildhibaan uu waqtigaan eedeeyo shacab Soomaaliyeed oo iska celinaayo Al-shabaab, halku taageero uga muujin laha, waxaan leeyahay guddonka Golaha Shacabka hadalka ninka hoos haloo eego oo baaritaan halagu sameeyo, Madaxweynaha iyo Raysal wasaarahana ayaga iclaamiyay dagaalka Shabaab, ninkaso kale ayaana Golaha sharci dejinta dhex fadhiya oo Al-shabaab ah ee wax halaga qabto arintiisa” ayuu yiri guddoomiye Jeyte.

Wuxuu intaasi ku daray guddoomiyaha Hiiraan in Xildhibaanka eedeynta u jeediyay ciidanka Macawiisleeyda deegaanka uu isaga matalo in Al-shabaab mudo 20 sano ku dhaw ay ka taliyaan, islamarkaana aysan dhicin in la arko isagoo hal mar xata dhaliil u jeedinaya Al-shabaab.

Gabagabadii guddoomiyaha gobolka Hiiraan ayaa si cad u sheegay in cid walba oo ka hortimaado kacdoonka uu sheegay in lagula dagaalamayo Al-shabaab ay u arkayaan mid loogu hiilinaayo Ururka Al-shabaab.

Si kastaba ha ahaate hadalkaan kasoo yeeray guddoomiyaha gobolka Hiiraan ayaa imaanaya, iyadoo Xildhibaan Xusul uu sheegay in ciidanka Macawiisleey ee dagaalada kula jira Al-shabaab loo baahan yahay in laga fiirsado taageerada loo muujinaayo, islamarkaana ay noqon karaan dhibaato horleh oo kusoo kordheysa dhibaatooyinka dalka ka jira.